Ċelebrazzjoni tal-Milied fid-djar ta’ familji Nsara
Fl-isem tal-Missier u tal-Iben u tal-Ispritu s-Santu. Ammen.
Illum nieħdu sehem f’din il-purċissjoni bix-xbieha ta’ Ġesu’ Bambin minn ħdejn il-bieb ta’ barra tad-dar tagħna. Nitolbu lil Ġesu’ jidħol għandna. Nimxu minn kamra għall-oħra sa ma naslu ħdejn il-benniena ta’ Ġesu’ Bambin.
Inkantaw jew naqraw flimkien ‘Qed jinfirex mal-widien’
Qed jinfirex mal-widien
Leħen l-anġli tas-smewwiet
Għanja ħelwa rahan ta’ ferħ
Qiegħda tfawwar qalb l-għoljiet.
Gloria in excelsis Deo x2
Ħallu l-għorfa tajjru n-ngħas
Rgħajja nġabru għall-aħbar
Aħbar tajba riesqa ’l hawn
Kollha ferħ bla qatra mrar.
Gloria in excelsis Deo x2
Fostkom twieled il-Mulej
Is-sultan tas-sema u l-art
Twieled f’għar sid il-ħolqien
Fuq ftit tiben f’lejl ta’ bard.
Gloria in excelsis Deo x2
Għaġġlu mela biex tarawh
Dak li xtaqu ż-żminijiet
Faħħruh magħna lkoll flimkien
Ġo dil-ħemda, ġo das-skiet.
Gloria in excelsis Deo x2
Il-lejla se niftakru fit-twelid ta’ Ġesu’ Bambin; twieled u sar jixbah lil kull wieħed u waħda minna. Ġesu’ tkellem bil-lingwa tagħna biex inkunu nistgħu nifhmu min tassew hu Alla. Għalhekk, ejjew ninġabru fit-talb bħala familja waqt li ngħidulu: Ejja Ġesu’ u sib post magħna f’din id-dar.
Nisimgħu ir-rakkont tal-Milied skont San Luqa (2, 4-7):
Ġużeppi wkoll mar mill-Galilija, mill-belt ta’ Nazaret, u tala’ l-Lhudija, fil-belt ta’ David jisimha Betlehem - għax hu kien mid-dar u l-familja ta’ David - 5biex jinkiteb flimkien ma’ Marija l-għarusa tiegħu, li kienet tqila. 6Ġara li, meta kienu hemm, Marija għalqilha ż-żmien biex teħles, 7u wildet l-ewwel iben tagħha, fisqietu u medditu f’maxtura, għax ma kienx hemm post għalihom fil-lukanda.
Ġesu’, smajna li ma kienx hemm post għalik fil-lukanda; imma llum nixtiequ ngħidulek li fid-dar tagħna għandek post, anzi il-post li lestejna għalik hi qalbna. Nixtiequ, għalhekk, li tiġi u ssib postok f’qalbna.
Kif inti, Ġesu’, inti hu daqshekk qrib tagħna, nduru lejk u nitolbuk biex tbierek lill-familja kollha tagħna, lill-ġirien u lill-qraba tagħna.
Nitolbu
Nitolbuk għall-morda, l-aktar dawk li jinsabu l-isptar f’din il-lejla sabiħa tal-Milied.
Nitolbu
Ħu ħsieb lil dawk li huma fid-dwejjaq minħabba xi problema kbira li jinsabu fiha.
Nitolbu
Għat-tfal kollha tad-dinja bħalek, Ġesu’, l-aktar dawk li huma bil-ġuħ u nieqsa mill-bżonnijiet ta’ kuljum.
Nitolbu
Inżidu talb ieħor li nixtiequ nagħmlu ...
Missierna
Ngħalqu billi nkanta flimkien: Ninni la tibkix iżjed
Ninni la tibkix iżjed
Ninni Ġesù bambin
Ħallih għalina l-biki
Għax aħna midimbin
Ejjew ejjew ja anġli
Mis-sema mija mija
Araw lil min ħalaqkom
Bambin ġewwa l-fisqija
Ejjew taraw b’għajnejkom
Dan Alla Kbir tal-ħniena
Bambin sabiħ u ħelu
Ininni ġol-benniena
Ħallu ja rgħajja ħallu
Il-merħla tan-nagħġiet
Tibżgħux min jindukrahom
Hemm l-anġli tas-smewwiet
Il-Mulej iberikna, iħarsina minn kull deni u jwassalna għall-ħajja ta’ dejjem. Nispiċċaw billi nagħtu l-paċi lil xulxin u nawguraw il-Milied it-tajjeb lil xulxin.