Riflessjoni għat-22 Ħadd ta' matul is-sena
mill-Arċipriet Dun Bastjan Caruana.
F’ċerimonji uffiċjali ma tistax taqbad u tpoġġi fejn jidhirlek int, imma trid issegwi l-istruzzjonijiet li jagħtuk minħabba l-protokol. Il-protokol hu sistema ta’ regoli uffiċjali li kulħadd mistenni jimxi magħhom f’okkażjonijiet differenti. Ħafna drabi m’hemmx wisq lok fejn tilgħab u tiċċaqlaq, tant li jinħatar master of ceremonies biex jara li dawn ir-regoli jiġu segwiti u b’hekk kollox jimxi mal-protokol. Hekk per eżempju l-President ta’ pajjiż jiġi l-ewwel u joqgħod f’post prominenti f’ċerimonji statali, waqt li Prim Ministru jpoġġi quddiem ministri oħra, l-Ispeaker tal-kamra tar-rapreżentanti għandu wkoll il-post ta’ unur tiegħu, u l-Prim Imħallef isib postu wkoll. Il-protocol ma nsibuħx biss f’ċerimonji statali, għax anke l-knisja għandha l-protokol tagħha. Il-knisja hi ġerarkika, u fost il-ministri ordinarji tagħha nsibu gradi differenti: djakni, presbiteri, isqfijiet, kardinali, sa ma naslu għall-Papa. Biex ma nsemmux ukoll kanoniċi, monsinjuri, kardinali eċċ. Waqt xi ċerimonja jew purċissjoni kulħadd għandu postu u ħafna drabi min hu l-aktar importanti jimxi fuq wara net. Anke jekk mhux daqshekk uffiċjali, l-protokol insibuh ukoll f’okkażjonijiet tal-familja, għax anke hawn, hemm regoli stabbiliti ta’ fejn wieħed joqgħod. Per eżempju waqt tieġ hemm post fejn għandhom joqgħodu x-xhieda, li hu differenti minn fejn ipoġġu l-ġenituri tal-għarajjes. Il-bridesmaids u l-flower girls jieħdu wkoll l-importanza tagħhom, imma qatt ma jieħdu post l-għarajjes infushom. Kulħadd jaċċetta li l-aktar persuni mportanti jitpoġġew f’post aktar prominenti fejn kulħadd ikun jista’ jarahom.
Imma Ġesù jaqleb l-ordni tal-protokol, u jirriversja l-ordni miftiehma minn kulħadd. Għax Ġesù, bħala Alla, m’hu marbut taħt ebda regola umana. Ġesù jagħżel regoli ġodda u jifforma protokol ġdid: jagħżel li jniżżel is-setgħana minn fuq it-tron u jgħolli liċ-ċkejknin (magnifikat); jagħżel li jsejjaħ ħenjin lil dawk li d-dinja tara msieken (il-beatitudnijiet). Għalih tal-aħħar jiġu l-ewwel u ta’ l-ewwel jiġu l-aħħar. Ipoġġi f’post ta’ unur lil min għandu l-anqas importanza, lil dawk li m’għandhomx minn fejn iroddu lura pjaċir bi pjaċir jagħmilhom bħala l-mistednin ewlenin tiegħu. F’bidla radikali! Issa aħna, bħala dixxipli tiegħu, imsejħin nimxu fuq dan il-protokol il-ġdid, fuq dawn ir-regoli ġodda. Ġesù jistedinna biex ma nilgħabux il-logħba tal-unuri u l-pożizzjonijiet għolja. Għad-dinja din il-filosofija ta’ Alla ma tagħmilx sens, għax id-dinja timbottak biex tavvanza, biex takkwista aktar u aktar unuri u biex tagħmel minn kollox ħa tirnexxi u titla’ 'l fuq kemm tista’. Dan it-taħbit nibdew nitgħallmuh fi tfulitna, għax mill-ewwel insibu min isus warajna ħa nkunu minn ta’ quddiem net fil-ħajja. Jenfasiżżaw fuqna biex ma nħallu lil ħadd jilħaqna jew jgħaddina u spiss iqanqlu fina sens ta’ kompetizzjoni biex nirbħu s-siġġu ta’ quddiem, jagħtuna nċentivi biex nitgħallmu nkunu aktar ambizzjużi fil-ħajja tagħna. Mill-banda l-oħra l-Mulej jagħllimna t-triq tal-umiltà, jgħidilna biex ma nfittxux il-postijiet ta’ quddiem imma nkun ġwejda f’dak kollu li ngħamlu. Dan ma jfissirx li għandna nkunu ġifa jew li nitilfu kull sens ta’ motivazzjoni biex ngħamlu ħilitna kollha ħalli noħorġu 'l aħjar tagħna. L-umiltà ma tfissirx li tarmi lilek innifsek, imma l-umiltà hi valur li tgħinek iżżomm postok. Tgħinek tkun realistiku u kapaċi taċċetta l-limitazzjonijiet tiegħek, waqt li tuża bl-aħjar mod il-kwalitajiet u l-kapaċitajiet tiegħek għall-ġid tiegħek u tal-oħrajn. Min hu supperv ma jaċċettax il-limitazzjonijiet u ssibu dejjem jitħabat biex jimpressjona u biex jiġbed l-attenzjoni fuqu, waqt li l-umli ssibu seren u fil-paċi għax jaċċetta dak li hu bla nkwiet ta’ xejn. Dak li jagħmel l-umli ma jagħmlux biex ikun aħajr mill-oħrajn imma għax jemmen li qed ikun ta’ għajnuna u ta’ ġid għal kulħadd. Fi kliem ieħor l-umli hu bniedem liberu, waqt li s-supperv hu bniedem imbeżża u kontinwament jingħalaq fih innifsu.
Illum il-Mulej qed iwissina biex ma nitjassrux billi nidħlu għal-logħba tad-dinja, il-logħba tal-unuri. Niftakru li min jitla 'l fuq għandu aktar x’jitlef; il-post ta’ fuq ma jistax iżommu għal dejjem u xi darba se jkollu jħallih. Mela għalfejn ngħamlu ħajjitna nitħabtu biex nitilgħu aktar fil-għoli? Aħjar inkunu kuntenti fejn aħna u ngħixu liberi kif aħna minflok nitħabtu u nibqgħu nitħabtu biex nilħqu aktar. Jekk, imbagħad, issib ruħek f’post ta’ prominenza, għix bl-aħjar mod f’dik il-pożizzjoni u żomm saqajk mal-art, titkabbarx u tirfisx fuq 'l oħrajn, imma kun umli; niftakru f’dak li smajna fl-ewwel qari: “akbar m’int iktar għandek iċċekken ruħek, u ssib grazzja quddiem il-Mulej.”