Riflessjoni għas-17 -il Ħadd ta' matul is-sena
mill-Arċipriet Dun Bastjan Caruana.
Anke jekk ma tkunx negozjant, xorta tieħu gost meta jirnexxilek tagħmel xi bargain tajjeb u takkwista xi ħaġa bl-irħis. Hawn min għandu wiċċu vera jaqilgħu; tarah jiġġebbed u jipprova jqaċċat il-prezzijiet biex jakkwista xi ħaġa iżjed. Illum ftakart f’din ir-realtà quddiem il-ġrajja ta’ Abram meta beda jiġġebbed ma’ Alla u jitolbu u jerġa’ jitolbu biex isalva l-popli ħżiena ta’ Sodoma u Gomorra. Abram talab lil Alla biex ma jeqridx lil dawn il-popli jekk isib 50 ruħ tajbin. Imbagħad niżel għal 45, u 40, u kompla nieżel 30, 20 u wasal sa10 persuni. Abram deher quddiem Alla bħala wieħed li m’għandu ebda mistħija, imma ma nistgħux ngħidu li hu kien qed jagħmel xi bargain ma’ Alla. Abram ma kienx qed ifittex l-interessi personali tiegħu. Ma kienx qed jipprova jakkwista xi ħaġa mingħand Alla għalih innifsu, imma kien qed jagħmel wiċċu biex isalva l-popli ħżiena. Abram kien jaf lil Alla. Kien jaf li għal Alla kull bniedem hu għażiż, u li ma kien sa jasal qatt li jikkastiga lil wieħed tajjeb minħabba l-ħażen ta’ madwaru. Kif jista’ Alla, li hu ġust, jeqred lil xi ħadd tajjeb? Anqas wieħed ma jintilef, anzi minħabba l-wieħed ġust, anke dawk li ma jkunux isalvaw.
Abram jurina li t-talb veru jikkonsisti minn rabta personali u profonda ma’ Alla, ikkaratterizzata minn umiltà, gratitudni u xewqa qawwija għal Alla. Dawn l-aspetti joħorġu b’mod ċar fit-talba li l-Mulej għallem lid-dixxipli tiegħu, kif ukoll lilna. It-talba tal-Missierna turina li t-talb mhux sempliċiment kliem imma mument fejn l-għatx ta’ Alla għall-bniedem jiltaqa’ ma’ l-għatx tal-bniedem għal Alla. It-talb jirrikonoxxi l-kobor ta’ Alla, kif ukoll il-limitazzjonijiet tagħna, u b’hekk ikabbar fina s-sens ta’ umiltà, kif ukoll ir-rikonoxximent tal-bżonn tagħna għall-grazzja u l-ħniena Tiegħu. It-talb mhuwiex biss dmir reliġjuż, iżda relazzjoni personali u esperjenzjali ma’ Alla. Huwa żmien ta’ riflessjoni fis-skiet, li fih nistennew lil Alla jitkellem magħna u jmexxina fil-ħajja tagħna. It-talb huwa ħin biex nirriflettu fuq it-tjieba ta’ Alla u nwasslu dik l-imħabba lid-dinja ta’ madwarna. Permezz tat-talb, nistgħu nesperjenzaw bidla personali u tisħiħ fil-fidi tagħna. Jista’ jwassal għal paċi interna u xewqa li ngħixu ħajja aktar qaddisa. It-talb veru jinvolvi wkoll li nfittxu r-rieda ta’ Alla għal ħajjitna u li nikkonfermaw ix-xewqat tagħna ma’ tiegħu. Min jitlob fl-ispirtu li għallimna l-Mulej ikollu fiduċja li anke jekk it-talb tiegħu ma jiġix mismugħ kif mixtieq, jaf li r-rieda ta’ Alla tibqa’ dejjem għall-ġid tiegħu. Ħajja ta’ talb b’saħħitha teħtieġ perseveranza u fidi fil-kapaċità u r-rieda ta’ Alla li jisma’ u jwieġeb. Nibqgħu nfittxuh, anke meta ma narawx riżultati immedjati. It-talb veru mhuwiex biss eżerċizzju spiritwali, iżda wkoll gwida prattika għall-ħajja tagħna ta’ kuljum. Jista’ jgħinna niffaċċjaw l-isfidi, nieħdu deċiżjonijiet aħjar, u nsibu t-tifsira u l-għan fil-ħajja tagħna.
Nistgħu nibqgħu ngħidu x’inhu t-talb, u kif nistgħu nitgħallmu nitolbu aħjar, imma inutli nitkellmu dwar it-talb jekk ma nibdewx nitolbu bis-serjetà. Nitgħallmu nitolbu meta nibdew nitolbu. Importanti li bħala nsara nkunu nies ta’ talb, inkella nibqgħu ngħixu b’fidi artifiċjali. Jekk it-talb ma jkunx parti ntegrali fil-ħajja ta’ kuljum tagħna, faċli nsibu ruħna nitolbu biss meta jkollna bżonn, bil-periklu li aktar nippruvaw nagħmlu bargain ma’ Alla milli nitolbu. Kull meta nitolbu t-talba tal-Missierna, ejjew nifhmu li aħna ninsabu f’relazzjoni mad-Divin, li jsalva u jifdi lill-bniedem. Infaħħruħ u nitolbuh biex titwettaq is-saltna tiegħu, jagħtina l-meħtieġ għall-ħajja u fuq kollox jaħfrilna dnubietna. Nagħrfu li hu biss jista’ jsalvana u jeħlisna mit-tiġrib. Bħal Abram, nitolbu u nibqgħu nitolbu b’konvinzjoni li Alla hu tassew ħanin u ġust ma’ kulħadd għax hu Missier.